مواقف حدثت في الغبااااااااااار

بعض الاحيان يمر على الواحد مواقف تعجبه و مواقف اخرى يستنكرها و هي كثيرة

امس صارلي موقفين واحد منهم عجبني و الاخر استنكرته

الموقف الاول

وانا راكبة سيارتي الحمدالله شفت مؤشر البنزين و كان بيصفر فقلت قبل ما ارد البيت خل امر المحطة و احط بنزين على الرغم من سوء الاحوال الجوية و القطيطة اللي كانت في الديرة :)

المهم وصلت المحطة و هي صغيرة و كان الطابر لين اخر العاير ..ترددت لحظتها قلت شكلي برد بعدين قلت لا احسن احط بنزين لا انسى و توقف علي السيارة مو حلوة خاصة مع الغبار المهم وقفت بالطابور حول عشر دقايق فجأة

و بدون مقدمات واحد يرد عكس السير و يدش المحطة و يطنش كل الواقفين و نازل ايصب حق روحة بنزين

ليش مو تارسين عينك العالم !!!

قلت اب قلبي اشوى انه مو دوري جان شنو بسوي اب هالغبار

و المحطة بس فيها الهنود اللي يحطون البنزين

meanwhile و انا نازلة اطلع فلوس من البوك رفعت راسي

و اشوف واحد يه حق اللي ياي wrongside و قالة لو سمحت صف بالدور الكل ناطر دورة و لازم تطلع و ترد و تصف بالدور

i was really thrilled

وناسة

تابعة الموقف و الشخص الغلط قام و صف بالدور

و طلع الشخص اللي زفه مسؤول المحطة داخل كبينته قاعد ايراقب الناس و لما شاف الغلط طلع و حاسبه

يعطيك الف عافية جد و لا غيرك ايقول غبار شطلعني من مكاني و يكثر من امثالك .

الموقف الثاني

و انا رادة من الدوام سمعت 88.8 برنامج الدوانية و كان في خالد الانصاري و بو جندل و كانت الحلقة عن المعاقين

ما سمعت الحلقة كاملة بس سمعت مقطع دايما ايضايقني بالمجمعات و هي عدم احترام اشارة المعاقين ذلك انه الموقف خاص بذوي الاحتياجات الخاصة و صدف و انا اسمع ان يكون احد المتصلين من ذوي الاحتياجات الخاصة و قاعد يشتكي من عدم توافر المواقف لذوي الاعاقة الجسدية و التي وضعت المواقف لمساعدتهم هم بالدرجة الاولى خاصة في المرافق العامة و الخاصة

و اضاف معلومات اول مرة اعرفها

تصوروا انه الغرامة الخاصة بالصف مكان المعواقين في الكويت هي

فقط 5 دنانير !!!!

مبلغ واااايد رادع

و في الامارات تدرون جم ؟!!

ما يعادل 50 دينار

يعني احسن شوي

لكن اللي صج رادع في UK

المبلغ يعادل 300 د.ك

THIS IS JUSTICE

يعني ماادري اللي يوقف بالواقف الخاصة فيهم ما ايفكر في انه ممكن ينصاب او احد يعز عليه و يحتاج الموقف ؟؟!!

هل اهيا جهالة

هل اهيا عدم مبالاة

صج ماادري

p.s:شكر خاص حق مارينا اف ام على الموضوع الحلو و على اهتمامهم و هو جد موضوع مهم و نفس ما قال خالد ذوي الاحتياجات الخاصة

شريحة مهمة من المجتمع الكويتي

انتو شرايكم ؟؟